Naguummong dagiti supporters ni Presidente Ferdinand “Bongbong” Marcos Jr. idi Sabado iti People Power Monument iti igid ti EDSA iti Quezon City.
Nakakawes dagitoy iti nalabaga ken awitda dagiti bandera a nakaisuratan dagiti mensahe a mangidaydayaw iti lideratona.
Ti panagummong dagiti sumagmamano a nakipaset ket panagsuporta iti Presidente ken ti administrasionna.
Mapatta-patta a dumanon iti 1,200 nga indibidual ti nakipaset, sigun kadagiti otoridad.
Maipalagip a ti People Power Monument ket maysa a pammadayaw kadagiti Pilipino a timmakder iti turay ti ama ni Marcos, ni pimmusay a President Ferdinand Marcos Sr., idi Pebrero 1986.
Maysa daytoy a pakaangayan dagiti commemorative rites para iti anibersario ti 1986 EDSA People Power revolution, pakairamanan ti maika-38 a panagrambak nga idauluan ti National Historical Commission of the Philippines (NHCP) idi Pebrero ita a tawen.
Iti agdama, awan pay ti komento ti Malakanyang seknan nu dagitoy iti nangorganisar iti nasao nga aktibidad.
