BAGUIO CITY – Nakemmeg sadiay Baangan, Mayag, Bauko, Mountain Province ti maysa a mannalon a suspek iti kaso nga statutory rape a napasamak iti nasao a lugar idi kanikadua.
Nabigbig daytoy a Quirino Aswigue Comnang a.k.a Bongcoy, 52-anyos, baro ken residente iti nasao a lugar.
Nagramot ti panakakemmeg ti suspek iti reklamo ti maysa nga ina gapu iti maatap a panangrames ti suspek iti anakna.
Maibasar iti salaysay ti ina, nakitana ti dos-anyos nga anakna a babai a napan iti balay ti suspek ken sadiay a nagay-ayam.
Kalpasanna, saannan a nakita ti anakna isut gapuna a napan daytoy iti balay ti suspek kagiddan ti panangipukpukkawna iti nagan ti anakna.
Nagatap ti ina idi nakitana a rimwar ti anakna iti balay ti suspek ken isimsimpa ti ubing ti panty daytoy.
Kabayatan ti panagawid ti agina, imbaga ti ubing iti inana no anya ti inaramid ti suspek kenkuana.
Innayon pay ti ina nga iti umuna a lawas idi napalabas a bulan ti Nobyembre ket inreklamo ti anakna a nasakit ti pribado a mabagbagi daytoy gapu iti panangiggem ti suspek.
Gapu iti daytoy, palpalagipan ti pulisya dagiti nagannak ken dagiti guardians iti kinapateg ti panagridam ken panagbalinda a responsable iti panangaywanda kadagiti ubbing wenno annak dagitoy.
