Pimmusay ti maysa nga OFW kalpasan a naipadamag a mapukpukaw idiay Riyadh, Saudi Arabia.
Nabigbig ti biktima a ni Juljirri Aggong, 30-anyos, agnanaed idiay Sulu, ken biktima daytoy iti hit-and-run.
Sigun kenni Overseas Workers Welfare Administration administrator Patricia Yvonne Caunan, napasamak ti insidente idi June 11 iti 12:31 PM iti King Salman Eastbound Road idiay Saudi.
Kinunana a naamuanen ti lugan a karaman, kasta metten ti plaka ken ti nagmaneho daytoy.
Addan ti abogado ti OWWA idiay Riyadh tapno mangimbestigar ti kaso, ken padpadasenda metlaeng a makaala ti CCTV video ti insidente.
Kabayatanna, kiddaw ti kabagian ti pimmusay a ni Mhaie Aggong ti hustisia para kenni Juljirri Aggong.
Naammuan a ni Juljirri ket inauna kadagiti kakabsatna ken mangmangged kas office cleaner idiay Riyadh iti innem a bulan.
