--Ads--
Nakadua ni Mary Jane Veloso ti pamilyana para iti paskua kalpasan ti sangapulo ket lima a tawen.
Daytoy ket gapu ta binisita ti pamilyana daytoy iti Correctional Institution for Women sadiay Mandaluyong City a pakairamanan dagiti dua nga anakna idi kalman.
Sigun iti kapamilya ni Veloso, naragsak dagitoy gapu ta iti kaunaan a gundaway ket nakita ket naarakopda ni Mary Jane a manun a tawen a naibalud sadiay Indonesia.
Kinuna met ti 16-anyos nga anak ni Veloso a nalaos ti ragsakda gapu ta nakitada ti inada.
Mangnamnama met ti pamilya ni Veloso a maipaay ti kiddaw dagitoy a clemency kenkuana.
Kabayatanna, panggep ti pamilya ni Mary Jane a bisitaen daytoy inton Enero a dies para iti maika-uppat a pulo a panagkasangayna.
