BAGUIO CITY – Agkidkiddaw ti tulong ita ti Manuel A. Roxas Elementary School para iti kanayonan a pwersa iti panakadalus ti paset ti pagadalan gapu iti manarimaan a road widening sadiay Barangay Sto. Rosario, Baguio City.
Daytoy ket gapu ta nakaharang dagiti sanga ti kayo iti bubong ken nakabalandra pay iti pagadalan.
Iti interview ti Bombo Radyo kenni Agustina Feria, mannursuro sadiay, agdandanag dagitoy gapu ta karaman a naiyanod dagiti pitak nu sadino sinumreken iti pagadalan.
Kinuna pay ti mannursuro a saan a nakasagana ti pagadalan gapu iti mapaspasaranda iti baet a mangrugin ti panagadal inton lunes, Hulyo 29.
Malaksid iti dayta, pakaseknan ti nasao a pagadalan ti saan pay a naurnos ken nalpas a main gate dagitoy.
Innayona nga innem a classroom ti naapektaran iti road widening.
Umap-apela pay ni Teodora Botis, Principal iti nasao a pagadalan, kadagiti men in uniform a tumulongda nangruna kadagiti bambanag wenno trabaho a kasapulan ti panagbagkat iti nasao a panagdalus.
