Pimmusay ti dua a Palestinian, agraman ti masikog a babai babaen dagiti puersa ti Israel idiay West Bank, sigun iti Palestinian health ministry.
Daytoy ket kagiddan ti napigsa a panangraut ti Israel kontra kadagiti militante a grupo ti Hamas iti nasao a lugar.
Kinuna ti Palestinian health ministry iti Nur Shams idiay amianan a West Bank a napalpaltugan ti baente tres anyos a ni Sundos Jamal Mohammed Shalabi, a walo a bulan nga agdadagsen wenno masikog, ken saan a nakalasat ti kargana nga ubing, ken nakaro pay a nadangran ti asawana.
Sigun kadagiti nakasaksi, napalpaltugan ni Shalabi ken lakayna bayat nga ikagkagumaanda ti pumanaw iti pagtaenganda.
Inlawlawag ti suldado ti Israel a ti insidente ket manarimaanen a suksukimaten ti military police criminal investigation unit-da.
Immunan nga impablaak dagiti suldado ti Israel a palawaenda pay ti counter-terrorism operation dagitoy iti amianan a West Bank agingga iti Nur Shams, maysa a refugee camp nga asideg iti ili ti Palestine a Tulkarm.
Nangrugi ti counter-terrorism operation idiay Jenin dagiti suldado, pulis ken intelligence services ti Israel idi Enero baente uno, ken inladawan dagiti opisial kas dakkel ken napateg nga operasion dagiti militar.
Ti operasion ket napalawa iti Tulkarm, Al Faraa ken Tamun idiay West Bank, ken inlawlawag ti militar a puntiriada dagiti militante.
