BAGUIO CITY – Mapangpanggep ti panakaisayangkat ti mass testing kadagiti mining community members ken dagiti sumagmamano a barangay sadiay Mankayan, Benguet inton December 16 wenno December 17.
Daytoy ket kalpasan a nagkari ti Bases Conversion and Development Authority (BCDA) iti panakaipasidong ti 4,500 nga indibidual iti mass testing para iti COVID-19.
Sigun kenni Mayor Frenzel Ayong, manamnama nga agturong ti 65 a miembro ti BCDA sadiay inton December 15 para iti nasao a panggep.
Kinunana a maipatungpal ti mass testing kadagiti barangay ti Poblacion, Tabio, Sapid ken Paco.
Kinunana a no maipaayanda pay ti gundaway ket mairaman metlaeng a maipasidong iti eksaminasyon dagiti residente sadiay Cabiten ken Colalo.
Innayon ti mayor a manarimaan ita ti kooperasyonda kadagiti medical officers para iti pannakaipinal ti pannakaisayangkat ti nasao a banag sadiay Mankayan.
