BAGUIO CITY – Agtultuloy ti masterlisting kadagiti barangay ditoy Baguio City para iti panakaipinal ti listaan dagiti maipangruna a mabakunaan kontra iti COVID-19.
Sigun kenni Benjamin Macadangdang, dadaulo ti Barangay Affairs Office, manamnama a maituloy ti masterlisting kalpasan ti Semana Santa kadagiti dadduma a barangay ditoy siudad.
Inaklonna a bassit laeng dagiti nagpalista idi damo isut gapuna nga insingasingda ti panakaipatungpal ti masterlisting kadagiti babbarangay.
Innayonna a maipatungpal metlaeng ti house-to-house registration para kadagiti residente a saan a makaruwar kadagiti pagtaenganda partikular kadagiti natataengan ken addaan iti dadduma a sakit.
Kinunana a ginudwada tunggal distrito dagiti barangay para iti naparpartak a panakaisayangkat ti masterlisting.
Kagiddan iti daytoy, iyap-apelana kadagiti 18-anyos nga agpangato ti boluntaryo a panagparehistroda iti masterlisting kadagiti barangayda nangruna kadagiti saan a nadanun dagiti mangisaysayangkat ti house-to-house registration.
Innayonna a babaen iti daytoy ket mapapartak ken matulungan dagiti opsiyales ti barangay a mangipatungpal iti nasao a masterlisting.
