BAGUIO CITY – Makipatang ni La Trinidad, Benguet Mayor Romeo Salda kenni Manila City Mayor Isko Moreno tapno mapagsasaritaan ti kiddaw dagiti mannalon ken traders ditoy lokalidad a saan a panakaituloy ti panggep a panakairikep ti Divisoria iti las-ud ti tallo nga aldaw.
Panggep ti lokal a gobierno ti Manila a mairikep ti kalsada nga agturong sadiay Tondo ken Divisoria area mangrugi inton Enero 17 aginggat 19 para iti pannakarambak ti piesta ti Sto. Niño of Tondo.
Kaipapan daytoy nga awan ti maipatungpal a traksaksion iti negosio sadiay Divisoria nga agresulta iti saan a pannakailako dagiti highland vegetables.
Sigun kadagiti mannalon, no maisardeng ti transaksion sadiay Divisoria ket karkaro dagitoy a malugi nangruna ta nababa ti presio dagiti nateng ken awanen ti sabali a lugar a paglakuanda kadagiti produktoda a nateng.
Mangnamnama ni Mayor Salda iti positibo a sungbat ni Mayor Moreno tapno saan nga agsagaba dagiti mannalon ken negosiante a maapektaran.
