BAGUIO CITY – Im-imbistigaran ita ti Anti-Cybercrime Division ti La Trinidad PNP ken ti Police Regional Office – Cordillera ti mapapati a pangta iti biag ni La Trinidad Mayor Romeo Salda.
Maibasar iti report ti pulisya, nakaawat iti mensahe ti mayor manipud iti saan pay a nabigbig a texter a nangkuna a rumbeng a tambangan ken saanen padanunen ti ama ti ili iti munisipyo a sibibiyag.
Dagos nga impasa ti mayor kenni Major Joeffer Banglayan, hepe ti La Trinidad PNP ti nasao a mensahe.
Nakikoordinarda metten iti maseknan a teleco ditoy lokalidad tapno mabigbig ti nasao a texter.
Naduktalan pay ti pulisya a nakaawaat metlaeng ni Mayor Salda iti bomb threat.
Naipadanun iti mayor nga adda ti nakakabit a bomba iti nagduduma a paset ti opisina ti Municipal Disaster Risk Reduction Management Council.
Dagus a nagaksion dagiti pulis iti nasao a pangta ngem nagnegatibo daytoy.
Impanamnama met ti pulisya ti panangtutukda iti kaso tapnu maduktalan ti pakabigbigan ti suspek a nangpangta iti biag ti mayor.
Kabayatanna, impeksa ni Mayor Salda a saan a nasayaat nga angaw ti naawatna a mensahe nangruna iti mapapati a panakaimula dagiti bomba iti nagduduma a paset ti opisina ti Municipal Disaster Risk Reduction Management Council.
Pinalagipana met dagiti umili ti La Trinidad iti panagridamda ken iti panakikoordinarda kadagiti otoridad iti kanito maka-awatda ti pangta iti biag.
Binallaagan pay ti mayor ti saanpay a nabigbig a suspek a nupay ang-angaw laeng ti panangipatulodna iti nasao a mensahe ket saan a rumbeng a maulit daytoy gaputa saan a maiparbeng ti panangipangta ti biag ti uray asinoman. (-Bombo Florence Paytocan)
