Naala ti camera ti maysa a baket a nangbato iti kotse a limmabas iti sanguanan ti balayna idiay Vintar, Ilocos Norte.
Kas pammales, dinadael met ti drayber ti balay ti baket babaen ti landok.
Iti closed circuit television (CCTV) footage, maimatangan ti panagbato ti sisentay kuatro-anyos a ni Renie Leaño iti maysa a kotse a dimmalan iti sanguanan ti balayna.
Simardeng ti kotse ken bimmaba ti drayber a naka-iggem ti landok ken dinadaelna iti ruar ti balay ni Leaño, nga iti dayta a kanito ket nakastreken iti uneg ti pagtaenganna.
Nagreport ni Leaño iti pulisia seknan iti insidente, ken kinunana a napartak ti panagtaray ti kotse ken dandani a maatalan ti asona iti ruar ti balayna.
Nagreport met ti drayber iti barangay seknan iti inaramid ni Leaño.
Saan pay a nalawag nu adda ti napagnumuan ti dua.
Idi napalabas a Marso, viral metlaeng iti online ni Leaño gapu iti panagbatona iti maysa a rider a limmabas metlaeng iti sanguanan ti balayna.
Idi nagsinnango ti dua iti sanguanan dagiti otoridad, dimmawat ti dispensar ni Leaño ken kinunana a naaramidna laeng ti panagbato gapu iti mental ken emotional stress.
Nagkari metlaeng a saaannan nga ar-aramiden ti inaramidna.
