Panggep ni Jericho Gapuz, maysa a taxi driver ken vlogger iti siudad ti Baguio a mapagtalinaed ti napintas a pakabigbigan dagiti taxi drivers iti siudad rason a mangidiadiaya daytoy iti libre a sakay para kadagiti dialysis patients, masikug ken addaan ti emergency.
Daytoy ket iti laksid a kidkiddawen dagiti taxi driver ti kanayunan a a flag down rate para iti kanayunan nga income-da.
Iti pannakiuman ti Bombo Radyo kenkuana, kinunana a maysa daytoy a wagas tapno ipakitana ti panagyamanna kadagiti sumupsuporta iti vlogs-na ken wagas tapno maibingayna ti urnongna kadagiti vlogs daytoy.
Kinunana nga initiatibona nga aramiden ti libre a sakay nupay kasta, kinunana a saan laeng a daytoy ti mangipapaay ti libreng sakay a taxi driver.
Innayonna pay a daytoy ket para iti panangipakitana nga adda latta dagiti naanus a taxi driver iti baet nga adda dagiti saan a nasayaat a pasamak ken pakasaritaan a mainaig kadakuada.
Namnamaenna met a mapagtalinaed dagiti taxi driver dagiti napintas nga ugalida.
