BAGUIO CITY – Kinumpirmar ti Philippine Army nga adda ti nadangran a kameng ti 102nd Infantry Batallion iti arm encounter ti militar ken New People’s Army sadiay Licuan-Baay, Abra idi kalman, Nobyembre kwatro.
Iti eksklusibo nga interview ti Bombo Radyo, kinuna ni Captain Rigor Pamittan, Spokesperson ti 5th Infantry Division, manarimaan ti hot pursuit operation ti militar kontra kadagiti terorista a grupo a responsable iti ipupusay dagiti dua a soldado idi Oktobre 27.
Nasalaw ti tropa ti 102nd Infantry Batallion ti mapatta-patta a sangapulo a kameng ti Kilusang Larangang Guerilla (KLG) – North Abra a nagresulta iti rinnupak.
Nangrugi ti engkwentro, alas kwatro ti malem idi kalman ken nagpaut iti sangapulo ket lima a minutos a nangitunda iti panakadangran ti maysa a kameng ti soldado.
Kalpasan daytoy, naglibas ti terorista a grupo agingga a nakarinnupakda manen ti 24th Infantry Batallion a nagpaut ti lima a minutos.
Immuna iti daytoy, kinuna ni Captain Pamittan nga adda ti nadiskobre ti militar a temporary hideout dagiti terorista sadiay Barangay Cauayan, Licuan-Baay, Abra idi Nobyembre 3.
