Pimmusayen ti maysa a lalaki a biktima ti panagdanug iti maysa a restaurant bar idiay Jose Building, Betag, La Trinidad, Benguet.
Immuna a naireport ti maysa nga insidente ti panagdanug idi itay laeng nabiit nu sadinno, nagturong ti biktima nga adda ti kadwana iti maysa a restaurant bar ti nadakamat a lugar idi adda ti saan a nagkinnaawatan ti biktima ken ti maysa pay a suspek a saan pay a nabigbig iti dayta a gundaway.
Gapu iti saan a panagkinnaawatan, dinanug ti suspek ti biktima a nangitunda iti pannakatumbana.
Nakabangon pay ti biktima ken naturog iti lamisaan babaen ti panangasistar ti waitress ngem nadiskobre laengen daytoy nga “unconscious ” idi immaldaw, a dagosda met nga intaray iti ospital.
Naiyakar daytoy iti Baguio General Hospital manipod iti maysa a pag-agasan para iti advanced care kalpasan a nakumpirmar a nagsagrap ti dua a “blood clots” iti paset ti ulona gapu iti pannakadanug ken pannakatumbana.
Ngem kalpasan ti sumagmamano nga aldaw, nakaawat ti awag dagiti kameng ti La Trinidad Municipal Police Station a naideklara a pimmusay ti biktima.
Sigun iti nasao nga opisina, sakbay pay a naawatda ti awag manipod kadagiti otoridad, nangipatungpalen dagitoy iti follow-up investigation iti nasao nga insidente nu sadinno, nabaelanda a mareview ti CCTV footage a naala manipod iti nakapasamakan ti insidente.
Maibasar iti footage, naimatangan ti maysa a lalaki a nakakawes ti t-shirt nga addaan ti marking ti nagan ti maysa a negosio.
Gapu iti naalada nga impormasion, nagturong a dagos dagiti imbestigador iti lokasion ti negosyo wenno talon idiay Longlong, Puguis, La Trinidad, Benguet ket impakitada ti ladawan ti maysa a suspek.
Kinumpirmar met ti assistant manager nga empleyadoda daytoy.
Amin nga empleyado ket naayaban para iti kanayunan a damag nu sadinno, impakaamoda ti bukodda a bagi. Dagitoy ket agtawen ti 21, laborer ken residente ti La Trinidad, Benguet; 39, ken ti maysa ket agtawen met ti 40 nga stay-in farmer.
Idi rabii, maysa a lalaki nga agtawen ti duapulo ket tallo ti nagturong iti istasion ti pulisya a nangbigbig ti bagina a kaduana ti biktima idi napasamak ti insidente nu sadinno, nabugbog metlaeng daytoy, a mabuya metlaeng iti CCTV.
Iti agdama, naalan dagiti sworn statement dagiti complainant– ti nanang ti biktima, ti lalaki a kadua ti biktima ken dagiti dadduma pay a saksi iti insidente.
Naisagana metten dagiti dokumento para iti panangipila ti kaso a frustrated homicide ken homicide kontra kadagiti suspek. | Bombo Noveh Organo
