BAGUIO CITY- Nadangran ti maysa a lalaki kalpasan ti napasamak nga insidente ti pammaltog agarup 11:30 idi rabii ti March 3 sadiay Sitio Lipit, Brgy. Ubbog, Bangued, Abra.
Nabigbig ti biktima a ni Felix Buenavista Lomidao, addaan iti umno nga edad ken residente ti Sitio Lipit, Lipcan, Bangued, Abra.
Nabigbig met ti maatap a suspek a ni Jocel Catalan Boyo alias ” Negro ” addaan iti umno nga edad ken residente met ti Cabuloan, Bangued, Abra.
Maibasar iti report, agin-inom ti biktima ken ti suspek iti maysa a natayan idi killaat nga pinaltogan ti suspek ti biktima.
Nagsagrap ti tama ti paltog iti barukongna ti biktima ken dagus a naiturong iti pagagasan bayat a dagus met a naglibas ti suspetsa.
Agtultuloy met ti panagsukimat dagiti otoridad iti napasamak nga insidente kasta met ti panakasapol wenno panakatiliw ti nabigbig a suspek.
