BAGUIO CITY – Manamnama a mapilaan iti kaso a physical injury ti maysa a lalaki kalpasan a binuyatanna iti napudot a danum ti 37-anyos a painter sadiay Poblacion, Itogon, Benguet itay nabiit.
Nabigbig ti biktima a ni Maximo Casaba Corrit Jr., residente ti Tuding, Itogon, Benguet bayat a ti suspek ket ni Jayson Constantino, addaan ti legal nga edad, tubo ti Samar, Leyte ken residente ti Beckel, La Trinidad, Benguet
Maibasar iti report ti pulisya, nakaturog ti biktima iti barracks dagitoy idi binuyatan ti suspek ti likodna iti napudot a danum nga awanan iti umno a rason.
Dagus a tinippay (swiped off) ti biktima ti electric kettle manipud iti ima ti suspek.
Dinamag ti biktima nu apay nga inaramid ti suspek daytoy ngem nangisawang ti suspek ti saan a nasayaat a sasao a nangitunda iti panag-apa dagitoy.
Innanawa ti kadwa ti biktima ti panag-apa dagitoy nu sadino dagus a naglibas ti suspek iti saan nga amo a direksyon.
Dagus a naitaray ti biktima iti Baguio General Hospital babaen iti Municipal Ambulance ti Itogon.
Nagsagrap ti likod ti biktima iti scald burn, torso ken gluteal area.
Maisagsagana metten ti kaso a maipila kontra iti suspek.
