BAGUIO CITY – Maaramat laeng kas prophetic hospital para iti maysa a pabuya ti maysa a pasdek ti Benguet State University (BSU).
Pammalawag daytoy ni BSU President, Dr. Felipe Comila kasaruno ti panagwaras iti social media dagiti ladawan ti nasao a pasdek iti uneg ti unibersidad nga addaan ti tatak nga “Our Lady of Pines Hospital”.
Kinunana a naarkusan laeng ti pasdek ti Institute of Human Kinetics taonu aglanga nga ospital para iti shooting ti maysa a pabuya.
Dinakamatna a nagturong iti BSU ti production house a Feelmaking Productions, Incorporated manipud Quezon City para iti panangbukelda ti maysa a pelikula mainaig iti agdama a COVID-19 pandemic.
Imbinglay ni Dr. Comila a maaramat ti pasdek iti uneg ti 10 nga aldaw ken maabangan daytoy iti P200,000 wenno katukad ti P20,000 iti innaldaw.
Inkalinteganna pay a makatulong ti nasao a gatad iti pamastrekan ti BSU a maaramat iti pagsayaatan dagiti estudyante ken empleyado bayat a saan paylaeng a maar-aramat ti nasao a pasdek.
