Kinumpirmar ti Baguio City- Traffic Enforcement Unit iti Bombo Radyo a pimmusay ti maysa a senior citizen a lalaki iti napasamak nga aksidente idiay Magsaysay Avenue, Baguio City itay malem.
Kabayatanna, sigun kadigiti otoridad, uppat ti lugan a nadadael gapu iti napasamak a panangbibinangga dagiti lugan iti junction ti Magsaysay Avenue ken Hilltop Street pasado alas-kuwatro ti malem, ita nga aldaw.
Sigun iti pablaak ti Baguio City Public Information Office, imbinglay ti Baguio City Police Office (BCPO) a nabangga ti biktima babaen iti Isuzu closed van nga imanmaneho ti lalaki nga agtawen iti 48 a maatap a naaddaan iti mechanical trouble kabayatan iti panagmanehona manipud Hilltop Street paturong Magsaysay Avenue.
Naibangga metlaeng ti nasao a van iti maysa pay a lugan a Toyota Hilux nga imanmaneho ti lalaki nga agtawen ti 28, maysa pay nga Toyota Innova nga imanmaneho ti maysa nga studyante.
Nairaman metlaeng iti nasao a collission ti maysa pay a Toyota Innova taxi nga imanmaneho ti lalaki nga agtawen iti 44.
Dagos met a nirespondean daytoy dagiti Bureau of Fire Protection (BFP) personnel ken nangipaay iti medical treatment iti biktima. Nupay kasta, pimmusay metlaeng daytoy.
Sigun pay iti nasao a pablaak, mannarimaan pay laeng ti imbestigasyon seknan iti napasamak ken dagiti resposable iti daytoy.
