Nakabalud ita ti maysa a sidecar boy kalpasan a nagtakaw iti maong pants iti maysa a bazaar iti siudad ti Baguio.
Ti lalaki ket agtawen ti 45 ken residente idiay Tondo, Manila bayat a ti nagreklamo ket personnel ti bazaar, babai ken agtawen ti 24.
Maibasar iti report ti pulisia, nagturong ti suspek iti paset ti maysa nga establishimento a pakasarakan dagiti kagawaan dagiti lallaki ken nangala iti dua a branded a pantalon.
Inasistaran daytoy ti maysa nga empleyado iti fitting room.
Kalpasan ti sumagmamano a minutos, insubli ti suspek ti inalana a pantalon.
Nupay kasta, nadlaw ti complainant wenno ti empleyado ti establisimiento a maysa laeng a pantalon ti insubli ti suspek.
Idi damagenna koma ti suspek, dagos daytoy a timmaray iti exit area ti establisimiento.
Idi nakadanon daytoy iti exit area, naguni ti security alarm nga isu’t rason met tapno dagos a sipduten ti security guard ti sling bag ti suspek ken narekober kenkuana ti pantalon nga agbalor iti P12, 897.
Nupay kasta, nakataray ti suspek manipud iti nasao nga establisimiento.
Ngem natiliw metlaeng daytoy iti nasao a petsa babaen iti tulong dagiti tallo a personnel ti Baguio City Police Office a mangipatpatungpal iti foot patrol.
Naiturong metten dagiti ebidensia ken ti suspek iti Baguio City Police Office- Police Station 7 para iti umno a disposision.//
