BAGUIO CITY – Naiparikep ti Institute of Building Foreign Language Inc. (IBFL) idiay No. 11 M. Ponce Street, First Road, Quezon Hill Proper, Baguio City ita nga aldaw.
Ti panakaiparikep ti nasao nga establishemento ket indauloan ni Department of Migrant Workers Undersecretary for Licensing and Adjudication Service Bernard Olalia ken Asst. Sec. Francis de Guzman ken Director Atty. Eric Dollete.
Sigun kenni USec Olalia, naireport kadakuada a ti Japanese learning center ket nangideploy ti empleyado sadiay Japan uray awan ti lisensya manipod iti Department of Migrant Workers nga ag-hire, agrecruit ken agrefer ti empleyado nga agturong iti ballasiw-taaw.
Malaksid iti dayta, dimmanon iti dua agingga tallo nga indibidual ti naipatulod ti language center iti ballasiw-taaw ken maatap nga adda ti pakainaiganda iti lisensyado a recruitment agency idiay Metro Manila.
Innayona pay a maipawil nga agrefer dagiti language centers iti lisensyado nga ahensya.
Maimbestigaran metlaeng ti language center gapu ta maatap metlaeng nga agsingsingir daytoy ti training fee a dumanon iti P80-K agingga P100-K.
Dagiti met nabiktima ket agnanaed metlaeng iti siudad ti Baguio ken iti probinsiya ti Benguet.
Impeksada pay nga immuna a binista ti opisina ni City Mayor Benjamin Magalong ken dagus nga imparikepda ti language center ken impakanselarda ti business permit daytoy.
Kabayatanna, nainget a pinaglibakan ti akinkukua iti establishmento a saan nga iligal recruiter dagitoy.
Maipalagip a ti language center ket nangrugi a nag-operate sipud pay tawen 2018.
Daytoy ti maika-12 nga illegal recruitment agency nga impaserra ti Department of Migrant Workers iti pagilian ita a tawen.
