BAGUIO CITY–Saanen a kasapulan a mangiparang dagiti residente ti La Trinidad, Itogon, Sablan, Tublay ken Tuba (LISTT) areas iti Medical Clearance wenno certificate ken ti health declaration form (HDF) no agturongda ditoy siudad ti Baguio, epektibo ita nga aldaw.
Inlawlawag daytoy ni City Administrator Engr. Bonifacio dela Pena kabayatan ti eksklusibo a panakiyuman ti Bombo Radyo Baguio kenkuana. .
Dinakamatna kas maibasar iti Executive Order 21, series of 2021 nga impaulog Mayor Benjamin Magalong a kasapulan laengen nga iparang dagiti LISTT residents ti identification card wenno ID dagitoy kas pamaneknek a residente-da kadagiti nasao nga lugar.
Kinunana a kasapulan laengen nga iparang dagiti LISTT residents ti identification card wenno ID dagitoy kas pamaneknek a residente-da kadagiti nasao nga lugar.
Malaksid iti dayta, saan metlaeng a kasapulan ti negatibo a resulta ti swab test wenno antigen test dagiti pribado ken parapubliko nga health workers nga agturturong ditoy siudad.
Karaman pay dagiti mailaksid iti panagsubmitir iti test result dagiti cargo ken logistic services, telcos ken dadduma pay ngem nasken a sukimaten pay dagitoy dagiti kameng ti pulis.
Kabayatanna, impetteng ni Engr. dela Pena nga awan ti nagbaliwan kadagiti requirements a kasapulan sakbay ti panagturong dagiti turista , not authorized outside of residences (Non_APOR) ken dagiti agtaud iti nagduduma a lugar.
Inlawlawagna nga awan metlaeng ti nagbaliwan dagiti dadduma a pagalagadan ken panagbiahe paturong kadagiti sabali a lugar malaksid kadagiti nadakamat a panagbaliw iti pammilin ti lokal a gobierno.
Maipalagip nga idi Pebrero 1 ket naibilin ti panangiparang manen dagiti residente iti LISTT areas iti Medical clearance kadagiti border checkpoints sakbay a makauneg ditoy siudad.
