BAGUIO CITY – Natiliw ti maysa nga agilaklako kadagiti maatap a peke nga agas sadiay Manpey-as, Bulalacao, Mankayan, Benguet idi kanikadua.
Nabigbig daytoy a ni Edilberto Tomenio Traboco alyas “Edel”, 41-anyos, medicine distributor, tubo ti San Julian, Eastern Samar ken residente ti Bulalacao, Mankayan.
Nagpositibo ti search warrant nga impaulog ni Presiding Judge Jonathan Segundo ti Municipal Trial Court ti Mankayan, Benguet ken insayangkat dagiti otoridad iti pagtaengan ni Traboco.
Nakumpiskar iti pagtaengan ni Traboco ti 74 boxes ken 24 mats ti nagduduma nga agas.
Sumangsango ni Traboco ti kaso a panaglabsing iti R.A 8203 wenno ti Special Law on Counterfeit Drugs.
Kabayatana, natiliw ti dua nga indibidual bayat a nakumpiskar ti P13.56-M a gatad dagiti marijuana iti interdiction operation nga insangkat dagiti otoridad sadiay Dinakan, Dangoy, Lubuagan, Kalinga idi parbangon.
Maibasar iti report, naisayangkat ti operasyon babaen iti panag-checkpoint dagiti otoridad a nagresulta iti panakatiliw dagiti dua nga indibidual ken iti panakadiskobre ken panakakumpiskar ti kontrabando.
Nabigbig dagiti natiliw a da Aldren Paul Cabanes Pacion, 27-anyos ken Jaymor Sacatani Eusebio, 31-anyos, agpada a residente ti San Vicente, Tuao, Cagayan.
Mapattapatta met a 113 kilograms ti kadagsen ti nakumpiskar a kontrabando a bukbuklen ti 106 a marijuana bricks ken pito a tubular form ti marijuana.
Sumango dagiti dua iti kaso a panaglabsing iti RA 9165 wenno ti Comprehensive Dangerous Drugs Act of 2002.
