![](https://img.bomboradyo.com/baguio/2021/03/minor-marijuana-kalinga.png)
BAGUIO CITY – Natiliw ti maysa a menor de edad a maatap nga illegal drug courier iti interdiction/checkpoint operation sadiay Spring, Liwan West, Rizal, Kalinga idi kanikadua.
Ti nasao a barito ket agtawen ti sangapulo ket pito ken residente ti Cataggamman, Tuguegarao City, Cagayan.
Maibasar iti report ti Kalinga Police Provincial Office, nakaawat ti Rizal Municipal Police Station iti impormasyon seknan iti panangibiahe ti maysa a lalaki iti marijuana a ginatangna sadiay Ileb, Nambaran, Tabuk City.
Nailanad pay iti impormasyon a ti barito ket nakabisekleta ken paturong sadiay Tuguegarao City.
Dagus a nangimuntar dagiti pulis iti checkpoint ken sadiay a pinasardengda ti nasao a barito ken iti panangsukimatda iti backpack daytoy ket nakita ti plastic bag a naglaon ti naglalaok a napagango a marijuana.
Naamuan nga agdagsen iti agarup nasurok 450 grams ti iligal a droga ken aggatad ti mapattapatta a P54,000.
Sumangsango metten ti nasao a barito iti kaso a panaglabsing iti RA 9165 wenno iti Comprehensive Dangerous Drugs Act of 2002.