BAGUIO CITY – Impeksa ti 54th Infantry Battalion ti Philippine Army ti panangkondinarda iti panakapalpaltog ti maysa a rights advocate ken paralegal volunteer sadiay Ifugao.
Sigun kenni Lt. Col. Narciso Nabulneg Jr., commander ti nasao a batalyon, ni Brandon Lee a paralegal volunteer ti Ifugao Peasant Movement ket maysa kadagiti biktima dagiti aramid a kriminal nga insayangkat dagiti saan pay a nabigbig a suspek.
Kinunana a ni Lee ket aktibo nga advocate para iti panakaisakad ti pagsayaatan dagiti mannalon ti Ifugao ken dakkel ti kontribusyon daytoy iti komunidad isut gapuna a maladingitanda iti napasamak.
Impasiguradona ti panakikaykaysada iti gakat ti Ifugao Peasant Movement gaputa karaman dagitoy kadagiti kapatpatang ti militar para iti implementasyon dagiti nagduduma nga advocacy campaigns ti gobyerno partikular iti human rights, environment ken agricultural concerns.
Dinakamatna a manarimaan ti nasustinir a caravan activities ti militar ken partner agencies para iti panakaipaay dagiti serbisyo ken programa ti gobyerno ken non-government organizations kadagiti nasusulinek a lugar iti masakupan ti 54th Infantry Battalion.
Inkarina met kadagiti umili ken kadagiti kameng ti Ifugao Peasant Movement ti naan-anay a panangsurpotarda iti manarimaan a panakaimbestigar ti insidente.
Impeksa pay ni Lt. Col. Nabulneg Jr. ti inanamada iti napartak a panag-imbag ni Lee.
