BAGUIO CITY – Napalubosanen nga agoperate ti Minahang Bayan of the Federation of Taneg Indigenous Communities Livelihood Association a masarakan iti paset ti Barangay Taneg, Mankayan, Benguet.
Adaan daytoy iti 96.25 nga ektarya ti kalawana a lote a mabalin a pagminasan.
Paset daytoy iti plano ti gobierno a manayunan pay ti mapataud a pamastrekan ken output ti pagilian iti gold ken silver kalpasan ti deklarasyon ti Department of Environmental and Natural Resources (DENR) a mapalubosan ti legal nga operasyon dagiti small-scale miners iti pagiliaa.
Immunan nga inaprubaran ti Mines and Geosciences Bureau (MGB), ti panakapabaro ti kontrata ti small scale mining ti Loacan Itogon Pocket Miners’ Association (LIPMA) nga addaan iti 15 nga ektarya a pagminasan sadiay Barangay Loacan, Itogon, Benguet.
Iti datus, dumanon iti 43 ti pormal a naideklara kas Minahang Bayan iti pagilian nu sadinno 13 ket masarakan iti Luzon , tallo sadiay Visayas ken 27 sadiay Mindanao.
Malaksid iti daytoy, 170 nga aplikasyon ti nakapila tapno agbalin kas baru nga minahang bayan iti pagilian.
Maipalagip nga iti minahang bayan, maipapaayan laeng dagiti small-scale miners iti iti permit nga agoperate iti dua a tawen.
