BAGUIO CITY – Biagen manen ti Cordillera Regional Law Enforcement Coordinating Committee ti mining task force ditoy rehiyon.
Sigun kenni Committee chair ken Cordillera PNP regional director Police Brigadier General Israel Ephraim Dickson, paset daytoy ti panagsagana ti rehiyon iti umadani a panagtutudo wenno typhoon season a manamnama a mangrugi ita a bulan ti Hunyo.
Kinunana a babaen iti reactivation ti mining task force ket maipasigurado a saanen a mapasamak manen ti aniaman a mining related disaster kas iti killer landslide a napasamak sadiay Itogon, Benguet idi napalabas a tawen.
Bigbigen metlaeng ti mining task force dagiti lugar iti rehiyon nga addaan ti operasyon ti iligal a panagminas nangruna iti igid ti karayan wenno iti bakrang ti bantay tapnu mapasardengen dagitoy.
Innayon ni Dickson a no kasapulan ket mangipatungpal manen ti Philippine National Police iti forced evacuation kadagiti lugar a mabigbig a risk areas nangruna no saan nga agtungpal dagiti residente kadagiti pakdaar, ballaag ken apela dagiti maseknan nga otoridad.
Immunan a naiparikep ti 539 nga usok, 335 a paggilingan ken 234 a pagprosesoan ti linang ken nakumpiskar ti 33 a kilo ti cyanide iti dua nga aldaw nga Operation Itogon idi October 2018 babaen iti DENR-National Task Force – Mining Challenge.
Maipalagip nga idi September 15, 2018 ket nasurok iti 50 nga indibidual a kaaduan ket minero iti killer landslide a napasamak sadiay Ucab, Itogon, Benguet kabayatan ti Typhoon Ompong.
