Simmuko iti National Bureau of Investigation ni sigud a Mayor ti Iloilo City a ni Jed Patrick Mabilog, kalpasan ti pito a tawen a panaglemmengna sadiay Estadus Unidos.
Maipalagip nga inakusaran daytoy ni sigud a Presidente Rodrigo Duterte kas “major drug protector”.
Sinabat dagiti agents ti National Bureau of Investigation ni Mabilog apaman a simmangpet daytoy iti Ninoy Aquino International Airport Terminal 3 idi kalman, September 10, 2024.
Sumangsango daytoy iti kaso a panaglabsing iti Republic Act 3019 wenno ti Anti-Graft and Corrupt Practices Act, ken RA 6713 wenno Code of Conduct and Ethical Standards for Public Officials.
Ti warrant of arrest ket inruar ti Sandiganbayan 3rd Division ken Lapu-Lapu City Regional Trial Court Branch 73 sadiay Cebu.
Iti agdama, nakabalud iti National Bureau of Investigation-National Capital Region (NCR) detention facility sadiay Manila ni Mabilog ken naituding a maipresentar iti Sandiganbayan para iti pannakaisubli ti arrest warrant daytoy.
