BAGUIO CITY – Manarimaanen ti naan-anay a panakatingiting iti isyu ti maysa a mannursuro a nagviral gapu iti saan a nasayaat a panagsaritana iti saan pay nakumpirmar a klase daytoy.
Iti interview ti Bombo Radyo kenni Atty. Ronald Perez, Presidente ti Regional Federation of PTA-Department of Education – Cordillera, makita nga adda ti panaglabsing iti nasao a mannursuro rason a posible a sumango daytoy iti administrative charges apaman a mapaneknekan a maysa a public school teacher, ken nakasango a talaga kadagiti estudyantena.
Innayon ni Atty. Perez nga iti bileg ti Child Protection Act ti Department of Education, amin a kita ti panag-abuso ket mabalin a mangitunda iti panakadusa ti asinoman nga aglabsing iti uneg ti pagadalan nu sadino ti kaso ti nasao a mannursuro ket mabalin a maibilang kas verbal abuse.
Mainaig iti dayta, inlawlawag ti abogado nga ad-adda a nagbalin a sensitibo dagiti estudyante iti agdama a panawen rason a masapol dagiti mannursuro ti naan-anay a panagannad iti panakilangen ken wagas ti panagisuroda kadagitoy.
Nupay kasta, kinuna nga adda dagiti sumagmamano a mannursuro nga aglablabes rason nga impaganetgetna a masapol metlaeng ti agtultuloy a panakipasidong dagitoy kadagiti programa a mangsanay kadakuada tapno agbalinda nga epektibo para iti pananggun-od iti dekalidad nga edukasyon ti pagilian.
Kabayatanna, naipalagip met ti akem dagiti nagannak iti panangdisiplinada kadagiti ubbing gapu ta agparparang a narigrigat a surwan dagitoy iti agdama a panawen.//Bombo Rob Dominguez
