LA TRINIDAD, BENGUET – Kidkiddawen ti Commission on Elections (COMELEC) – Benguet iti central office ti naan-annay a pannakaadal ti singasing a re-registration wenno back-to-zero registration para iti 2025 election.
Iti interview ti Bombo Radyo, kinuna ni Atty. Elenita Capuyan, Provincial Election Supervisor ti COMELEC-Benguet a napintas ti panggep ni Commission on Elections Chairman George Garcia a maipatungpal ti panagparehistro manen dagiti rehistrado a botante gapu ta madalusan ti listaan dagiti botante iti pagilian.
Nupay kasta, imbinsa-binsa ni Atty. Capuyan dagiti agbalin a parikot iti kanito a maipatungpal daytoy.
Karaman ditoy ti kinakurang ti pondo, personnel ken oras.
Gapu iti daytoy, impettengna a masapul a maadal pay ti nasao a singasing sakbay a maaprubaran ken maipatungpal.
Kabayatanna, al-allukoyen ni Atty. Capuyan dagiti agtawen iti sangapulo ket walo nga agpangato, dagiti agakar iti pagbotosan ken dadduma pay nga agparehistroda mangrugi inton Pebrero 2024 aggingga inton Setyembre 2024 para iti 2025 national election.//Rosemarie Bulsao
