Rumrummuar iti imbestigasion ti pulisia a nabay-an a malutluto a taraon iti open area ti rason ti napasamak nga uram idiay Purok 2, Dontogan, Baguio City idi March 14, 2026.
Maibasar iti report dagiti otoridad, maysa a maseknan a citizen ti immawag iti istasion dagitoy a nangipakaamo nga adda ti grass fire a mapaspasamak iti nadakamat a lugar.
Dagos met a binerepikar dagiti otoridad ti nasao nga impormasion ken impakaamoda iti Tactical Operations Center tapno ipadamagda ti report iti BFP-Baguio.
Bayat nga ur-uryenda ti panagsangpet dagiti kameng iti BFP-Baguio, nagtitinnulong dagiti kameng iti BCPO-Police Station 10 ken dagiti citizens tapno sebseban ti uram.
Iti report, awan met ti nadangran ken awan ti sanikua a nadadael bayat ti kaadda ti uram.
Agarup ala-1:30 ti malem idi naideklara a fire out ti uram babaen kadagiti kameng ti BFP-Baguio.
Iti inisial nga imbestigasion dagitoy, impeksa ti agtawen ti 31, laborer ken residente iti nasao a lugar nga aglutluto daytoy iti open area idi pimmanaw iti paglutlutuanna tapno agdalos.
Gapu iti kinapigsa ti angin, dagos a nagramaram ti apoy iti kaasideg daytoy a namaga a grass.
Nagwaras ti uram iti agarup 1000 sqm.
Iti kaudian a report iti pulisia, ti insidente ket naiturn-over iti kameng ti BFP-Baguio para iti kanayunan a pannakaimbestigar.| via Bombo Noveh Organo
