Nadagsen ti linteg ngem isu ti linteg, kasano man kadagsen wenno kalag-an ti krimen, masapol a maipaayan iti aksion tapno daytoy ket mangipaay iti pannakaamo iti publiko a ti panagtakaw ket basol, nalag-an man wenno nadagsen.
Daytoy a prinsipio ket mainaig iti maysa a pasamak itay nabiit iti siudad ti Baguio nu sadino, dua a babbai ti naipaayan iti kaskenan a kaso gapu iti maatap a panagtakawda iti dua a pidaso ti “turon” nga aggatad laeng iti P50.00.
Napasamak ti panagtakaw dagitoy idi Nobyembre dise otso partikular iti maysa a food stall iti Magsaysay Avenue, Barangay Happy Homes, Baguio City.
Sakbay a mailemmeng dagiti suspek ti dua a turon ket nakita daytoy ti maysa a security guard.
Iti laksid a kinompronta iti guardia dagitoy, intuloy ladta dagiti babbai a tinakaw ti nasao a taraon.
Gapu iti dayta, inkeddeng ti agtagikua iti turon a mangipila iti kaso kontra kadagiti suspek iti city prosecutor’s office.
Sigun kadagiti dadduma a netizen, nalabit a nabisinan dagiti suspek isu’t gapuna nga inkeddengda a tinakaw ti nasao a turon.
Iti met benneg iti agtagikua iti nasao a tagilako, nalabit a ti bayad iti natakaw a turon ket isu laeng ti pamastrekanna.//Bombo Marielle Apat
