BAGUIO CITY – Mapalpalagipan ita ti publiko nangruna dagiti nagannak a bantayanda dagiti annak partikular dagiti ubbing nga agturong iti karayan.
Kasaruno daytoy ti ipupusay ti dua nga ubbing kalpasan a nalmesda iti Chico River idiay Sitio Cheppay, Bontoc Ili, Bontoc, Mt Province idi kalman, Agosto 4.
Immunan a nabigbig dagiti biktima a da da Chris Foman-eg Pangod Payocyoc ken Seth Paspas Pangod Comafay, agpada nga agtawen iti lima.
Iti interview ti Bombo Radyo kenni SFO3 Dick Allen Banasan manipud Bureau of Fire Protection – Mt. Province, awan ti kadwa dagiti ubbing a nataengan idi napasamak ti panakalmes ken saan unay a makita kadagiti residential areas ti paset ti karayan.
Maibasar iti inisyal nga imbestigasyon dagiti maseknan nga otoridad, posible a nagturong dagiti ubbing iti nasao a karayan tapno agay-ayam.
Sigun kenni Banasan, nakabado paylaeng dagiti ubbing idi nabirokan ti bagi-da.
Maysa kadagiti karit bayat ti panagrescue dagitoy ti napigsa a current ken ti nauneg a paset ti karayan a nakatnagan dagiti ubbing.
Maipalagip nga immuna a nakita ni Jason Ganisi Payocyoc ti anakna a ni Chris Payocyoc ken dagus a naitaray iti Bontoc General Hospital ngem naideklara a pimmusay bayat a naideklara a pimmusay ni Seth Comafay kalpasan a nabirukan ti bagi daytoy.
Kabayatanna, daytoyen ti maika-dua a kaso ti panakalmes ti nirespondean dagiti maseknan nga opisina iti agdama a tawen.
Immuna a nairekord ti insidente ti panakalmes idiay Barangay Tocucan, Bontoc, Mountain Province.
