BAGUIO CITY – Sinaggaysa ti baro a dadaulo ti Baguio City Police Office (BCPO) dagiti command orders wenno pammilinna a kadagiti pulis ditoy siudad.
Iti eksklusibo a panakiuman ti Bombo Radyo Baguio, dinakamat ni PCol. Glenn Lonogan a dakkel a karit ti posisyonna ita gaputa maysa metlaeng a kameng ti PNP ti agdama a mayor ti Baguio ken nangipaay pay iti outstanding performance ti sinukatanna a ni PCol. Allen Rae Co.
Kinunana a gapu kadagitoy ket nasken a makaaramid met daytoy iti napintas ken maipannakkel a trabaho tapno saan a kababain a maidilig kadagiti naglabas nga opisyal iti BCPO nangruna ta maysa daytoy a Cordilleran.
Bayat ti command conference ni Col. Lonogan kadagiti kadagiti dadaulo dagiti 10 nga istasyon ti BCPO ken kadagiti dadduma a personnel ket imbilinna ti panangtutukda iti serbisyoda ken iti ‘intensified cleanliness policy’ ti organisasyon.
Impettengna a babaen iti daytoy ket madalusan ti opisinada kadagiti saan a maikari a pulis ken madalusan metlaeng ti komunidad manipud iti aniaman a kriminalidad.
Imbilinna pay ti panangsarungkar dagiti station commanders kadagiti masakupanda a babbarangay tapnu makitada a mismo ken maadalda dagiti paset nga agkasapulan unay ti atension ken presensia dagiti pulis.
Imballaag pay ni Col. Lonogan ti panangipatungpalna iti panagbalasa no saan a magun-od dagiti station commanders dagiti rumbeng a kompletoen ken ipasada nga accomplishments kadagiti naituding nga aldaw.
Impanamnamana a kasuanna iti administratibo ken kriminal dagiti kameng ti BCPO a mairaman iti iligal nga aktibidad wenno aniaman nga aramid a mailabsing iti ethical standards ti PNP.
Iyap-apelana pay ti panagtulnog dagiti umili ti Baguio City kadagiti simple a minimum public health standards tapno saan nga isupay a palpalagipan ken sitsitaren dagiti pulis nangruna ta adu met ti pakakumikuman dagitoy.
Iti baet daytoy, impanamnama ni Col. Lonogan ti kinasagana ti BCPO a mangaramid iti mandatoda tapnu mapagtalinaed ti linak ken kappia ditoy City of Pines ken maipasigurado a natalged ken natalinaay ti iruruar dagiti umili ken turista ken mailiklikda iti aniaman a peggad. //CMSacyaten/edited
