BAGUIO CITY – Ngimmato ti presyo dagiti nagduduma a produkto a mailaklako iti Baguio City Public Market.
Iti panakiuman ti Bombo Radyo Baguio kadagiti vendors, magatang ita ti tunggal kilo ti manok iti P180 agingga P200 tunggal kilo.
Agtaltalinaed a nangina ti presyo ti karne ti baboy a magatang iti P300 agingga P380 tunggal kilo.
Nupay kasta, kinuna ni Ray, maysa kadagiti vendors, posible a bumaba ti presyo ti karne ti baboy iti sumarsaruno a lawas.
Magatang met ti tunggal kilo ti bangus iti P150 agingga P170 bayat a P180 agingga P200 iti galunggong.
Kabayatanna, ngimmina metlaeng ti presyo dagiti lowland ken highland vegetables gapu iti nangato a gastos dagiti vendors iti trackings.
Magatang iti P50-P70 ti tunggal kilo ti sitaw; P60-P100 iti tarong; P30-P35 iti karabasa; P90-P130 iti ampalaya; P80-P180 iti laya ken P15-P40 iti tunggal kilo ti kamatis
Magatang met iti P30 agingga P35 ti tunggal kilo ti repolyo; P35-P45 iti carrot; P120 iti brocoli ken P100-P120 iti Baguio beans.
Inlawlawag dagiti vendors a ti presyo dagiti nadakamat a produkto ket nakadependar iti kalidad dagitoy.
Impeksada pay a saanda a kayat nga aglako iti nangina a presyo gaputa bassit ti gumatang ngem kasapulan gaputa malugi dagitoy.//IVB
