BAGUIO CITY – Agtultuloy ti tulong a maipaay kadagiti pamilya a biktima ti napasamak nga uram idiay Gaerlan Street, Brgy. Campo Filipino, Baguio City agingga a makarekober dagitoy.
Iti interview ti Bombo Radyo kenni Joel Omar, Kapitan ti Brgy. Campo Filipino, immunan a naipaay ti inisyal a tulong pinansiyal ken kompleto a kits kadagiti biktima idi metlaeng kalman.
Sigun kenkuana, tallo a pamilya ti agtaltalinaed iti evacuation center bayat a ti innem a daduma pay ket nagturongda kadagiti kabagyanda.
Kinuna ti Kapitan a nu adda man ti mangayat a mangipaay ti tulong kadagiti biktima ket napinpintas a taraon wenno aniaman a donasyon para iti inaldaw a pagkasapulanda gapu ta sobsobra ti naidonar a kawes nga adda iti opisina dagitoy.
Impasiguradona nga iwanawan ken tulonganda metlaeng dagiti biktima a nagturong kadagiti kabagyan dagitoy.
Maipalagip a pimmusay ti maysa nga indibidual iti nasao nga insidente.
Kabayatanna, kinuna ni Omar a pakaseknanda ti panagsubli ti apoy gapu ta tallo a darasen a nag-apoy idi rabii ngem dagus nga impakaammoda ti nasao a kasasaad iti Bureau of Fire Protection.
Iti sabali a bangir, awan ti nagbalin a karit kagiti kameng ti bombero a nagresponde iti uram idi kalman.
Kinuna ni Omar nga one way ken saan a busy ti nasao a pagnaan isu a dagus a nakastrek dagiti rescuers.
Inyunay-unay met ni Kapitan Joel Omar kadagiti mangayat a tumulong a duritso a makikoordinarda kadagitoy tapno maliklikan ti pananggundaway.
