BAGUIO CITY – Nadiskobre ti nagtipon a pwersa ti pulisya ken militar dagiti armas ti mapapati a rebelde a grupo sadiay Abra idi kanikadua.
Maibasar iti report, nagturong ti tropa ti gobyerno iti nagbaetan ti Barangay Abang, Bucay ken Barangay Bilabila, Sallapadan tapno kumpirmaren ti impormasion a naawatda nga adda ti naikali a bala, magazine ken pampabettak iti nasao a lugar.
Kabayatan ti panagkumpirmarda iti impormasyon ket nadiskobre ken kinalida ti maysa a disso ken sadiay a nakitada dagiti armas a mapapati nga inkali dagiti rebelde.
Nasarakan dagiti armas iti uneg ti maysa a water jag a bukbuklen ti 75 a bala ti M-16 armalite rifle, uppat a bala iti caliber 22, maysa a rifle grenade, maysa a hand grenade, uppat a magazine ti M14, maysa a magazine ti AK-47, innem a magazine ti M-16 armalite rifle.
Kinumpiskar dagiti otoridad dagiti nasao a kagawaan ken iti agdama ket adda iti ikot ti pulisya.
