Agtultuloy a mapaspasaran ti nailet a gunay ti trapiko idiay La Trinidad, Benguet nangruna iti Km.3 agingga Km.5 gapu iti reblocking a maisaysayangkat a pakairamanan ti panakasukat dagiti concrete pavement kasta met ti panakapasayaat dagiti drainage systems.
Malaksid iti dayta, maexpand wenno mapalawa met laeng dagiti kalkalsada tapno saan daytoy a kanayun nga agbalbalin a bottlenecK ti trapiko.
Naituding a ti reblocking ket maileppas inton Hunyo 21, 2025 babaen iti Stay Construction.
Immuna met a naaramid ti tengnga dagiti kalsada rason a one way ti maar-aramat paturong iti siudad ti Baguio wenno iti munisipyo ti La Trinidad.
Gapu iti dayta, mabalbalaagan dagiti pampribado a motorista a mabalin a dalyasetanda ti Lamut-Beckerl Road wenno Longlong-Tam-awan road nu paturongda iti siudad ti Baguio tapno maliklikanda ti trapiko.
