Dumanon iti ₱7million ti gatad dagiti nakumpiskar nga illegally sawn lumber wenno kayo ti kinumpiskar dagiti otoridad iti Rehion Cordillera idi napan a tawen nu sadino, 14 met nga indibidwal iti naarestar.
Maibasar iti datos manipod iti Regional Operations Division iti Police Regional Office-Cordillera, dumanon iti agarop 365 nga anti illegal logging operations iti insayangkat dagiti kameng iti pulisya a nakaitunda iti balligi a panakaarestar dagiti responsable nga indibidwal.
Iti nadakamat a bilang, ti probinsya iti Ifugao iti addaan iti kangatwan a bilang dagiti naarestar a dumanon iti innem nga indibidwal, sarunwen met ti probinsya iti Benguet nga addaan iti tallo a naarestar bayat sagdudua met dagiti naarestar iti probinsya iti Apayao ken ti Mt. Province, ken maysa idiay Abra.
Mainaig iti dayta, dumanon met iti 86,316.13 board feet iti illegal a napukan a kayo ti nakumpiskar dagitoy nga addaan iti pakabuklan a gatad a ₱7,617,954.40.
Kabayatanna,dumanon met iti 1,777 a tree planting activities ti impatungpal dagiti kameng iti pulisya iti Cordillera nu sadino, agarop 60, 755 a seedlings ti assorted fruit-bearing ken non-fruit-bearing trees ti balligi a naimula kas paset ti panagregget dagitoy para iti panakapreserba iti aglawlaw.//Bombo Noveh Organo
