BAGUIO CITY – Dinayaw ti maysa a nangato nga opisyal ti Department of Health (DOH) ti napartak ken epektibo a sistema ti vaccination program ti siudad ti Baguio ken ti probinsia ti Abra.
Iti eksklusibo a panakiuman ti Bombo Radyo Baguio, kinuna ni DOH Undersecretary ken National Vaccination Operations Center Chairperson Dr. Myrna Cabotaje a napintas ti istratehiya ti Baguio ken Abra isut gapuna a napartak a maipapaibusda dagiti naipaay a bakuna kadagitoy.
Kinunana nga iti kinapudnona ket agdawdawat pay ti lokal a gobyerno ti ti Baguio ken Abra ti kanayonan a bakuna, partikular ti Astrazeneca manipud iti DOH ngem awan pay ti maitedda gaputa naiwaras metten iti dadduma a lugar.
Dinayaw na metlaeng ti agtultuloy ken komprehensibo a contact tracing scheme ni Mayor Benjamin Magalong nga ita ket ad-adaptaren ti dadduma a lokal a gobierno iti pagilian.
Gapo met iti napintas a performance ti Baguio City ken Abra iti implementasyon ti vaccination program kontra iti COVID-19 ket insingasing ni Dr. Cabotaje ti technical assistance nga ipaayda kadagiti lugar a nabuntog wenno sumangsango iti karit a mangiyemplementar iti vaccination program dagitoy.
Kinunana a ditoy nga ibinglayda dagiti wagas a maar-aramid iti Baguio ken Abra tapno matulongan ti dadduma lugar nangruna dagiti addaan ti ado paylaeng a suplay ti bakuna partikular ti Astrazeneca vaccine.
