Impasigurado ni Baguio City Mayor Benjamin Magalong ti dagos a panagtignay iti lokal a gobierno kadagiti reklamo iti umili.
Sigun kenkuana, napartak ti panagtignay iti lokal a gobierno kadagiti isyu nga ipadpadanon iti nagduduma a communication channels iti siudad. Kinunana a dagos a mamomobilisa dagiti response team iti oras nga adda ti maawat a reklamo.
Impaganetget pay ni Magalong a kaaduan kadagiti pakaseknan ket maaksyonan iti uneg iti 24 nga oras, ken iti sumagmamano a gundaway ket sumagmamano laeng nga oras ti maur-uray sakbay daytoy a marisut.
Imbinglay pay ti nasao nga opisial a personalna nga imonmonitor ti agarup 62 a chat groups nu sadinno, “real time” a maipakpakaamo dagiti report ken reklamo.
Agtultuloy met a guygoyugoyen iti siudad ti Baguio ti publiko a dagos nga agreport kadagiti pakaseknan, nangruna nu maipapan iti kinatalged ken kinadalus, tapno dagos a maaksyunan.
