Nasurok 260-K a gatad dagiti kagawaan, nauram ken nadadael iti panakauram ti maysa a balay sadiay Quezon Hill, BC
BAGUIO CITY–Dumanon iti nasurok P260-K ti gatad dagiti kagawaan ti nauram ken nadadael iti panakauram ti maysa a balay sadiay Ortigas Street, Quezon Hill itay agsapa.
Sigun kenni SFO3 Leo Mendoza, investigator ti Bureau of Fire Protection-Baguio, nabigbig ti akinkukua iti balay a ni [Mariedell Navarro] ken kadwana dagiti annakna idi napasamak ti uram.
Iti imbestigasion dagitoy, naduktalan a nagtaud ti uram iti altar babaen iti nasindian ti kandila.
Kinunana a nagbalin nga aktibidad ti pamilya nga agsindi iti kandila iti alas sais ti agsapa ken sardam para iti pimmusay a kapamilyada.
Nupay kasta, nabaybay-anda ti kandila iti altar a nangitunda iti uram iti agarop alas siete ti agsapa.
Dagus met a nagtintinulong dagiti residente a nangsebseb iti uram agingga a nakadanun dagiti kameng ti BFP-Baguio.
Gapu iti daytoy, partially damaged ti dua a kadsaaran a balay ken awan met ti nadangran iti nasao nga insidente.
