BAGUIO CITY – Agtultuloy ti panagawat ti Office of Civil Defense – Cordillera (OCD-CAR) iti report seknan iti nagbalin nga epekto ti panagdalapos ti bagyo nga Ulysses ditoy rehion Cordillera.
Maibasar iti kaudian a report ti OCD-CAR, manarimaan latta ti spilling operation ti dua kadagiti dams ditoy rehiyon
Inlukat ti Binga Dam sadiay Itogon, Benguet ti dua a gates daytoy iti 0.62 meter bayat a maysa a gate ti nailukat iti Ambuklao Dam sadiay Bokod iti 0.50 meters.
Iti met report ti DSWD-Cordillera, pakabuklanen a 1,288 a pamilya wenno 5, 199 nga indibidual ti naapektaran manipud iti 207 a barangay iti rehion.
Agtaltalinaed met iti tallo nga evacuation centers ti 6 a pamilya a bukbuklen ti 27 nga indibidual bayat a 356 a pamilya wenno 1,353 nga indibidual ti adda paylaeng kadagiti nagkamanganda a kabagian wenno kaarubada.
Nakalukat metten kas one lane passable ti 19 road sections nupay agtaltalinaed a nakarikep ti 9 a road sections iti rehion.
Pakabuklan pay a 812 a balay ti nadadael a bukbuklen ti 43 a totally damaged ken 769 a partially damaged.
Posible met a manayonan ti danyos iti sektor ti agrikultura gaputa iti progress report ti Department of Agriculture – Cordillera, dumanonen iti P22.7-M ti gatad ti dadael iti panagtalon bayat a nasurok P3.70-M iti panagtaraken iti ikan.
