BAGUIO CITY – Inlawlawag dagiti otoridad nga aksidente ti pannakatnag ti nasurok 70-anyos a babai a pimmusay iti maysa a hotel sadiay Kisad Road, Baguio City, pasado 8:00 a.m ti Domingo, Oktubre 04, 2026.
Maibasar iti report dagiti otoridad, ikagkagumaan ti biktima nga alaen ti saan a naiganan a banag iti rooftop idi napasamak ti aksidente.
Iti phonecall ti Bombo Newsteam manipud kadagti otoridad, kinompirmar dagitoy nga aksidente a natnag ti biktima manipud iti rooftop ti maika-walo a kadsaaran ti nasao a pasdek.
Sigun pay kadagiti otoridad, nagturong ti maysa a 19-anyos a lalaki iti rooftop tapno kitaenna dagiti imbilag daytoy a bado ken agsigarilyo.
Ditoy a nakitana ti biktima a nangikabil iti tugawan a monoblock iti asideg ti railings ti rooftop sakbay a pimmanaw.
Kalpasan ti sumagmamano a minutos, nagsubli ti biktima ken nagkiddaw iti tulong manipud iti nasao a lalaki tapno alaenda ti maysa a banag nga adda iti bangir a bubong.
Imbalakad ti lalaki nga agkiddaw laengen dagitoy iti tulong manipud kadagiti staffs ti hotel.
Nupay kasta, impilit ti biktima nga alaen ti nasao a banag ken kimmalay-at iti tugawan ken railings.
Iniggeman ti lalaki ti bado ti biktima ngem naibbatana gapu iti tarigagay ti biktima nga alaen ti nasao a banag.
Dita metten nga aksidente a natnag ti biktima a nagresulta iti ipupusay daytoy.
Nakompirmar a pimmusay ti biktima gapu iti fatal injuries nga iti agdama ket nakamasayag iti maysa a punerarya iti siudad.// via Bombo Noveh Organo
