Dumanon iti 597 ti bilang dagiti purok wenno babbarangay iti Rehiyon Cordillera nga underserved ken unserved wenno dagiti saan unay a makaaw-awat kadagiti serbisyo medikal maibasar iti datos iti Department of Health-Cordillera.
Iti naipatungpal a Benchmarking/Convergence Assembly para iti PuroKalusugan iti nasao nga ahensya,imbinglay ni Dr. Anachris Kilakil a ti probinsya ti Ifugao ti addaan iti kangatuan a bilang ti underserved ken unserved a babbarangay a dumanon iti 140.
Sinaruno met daytoy iti Benguet ken Kalinga nga addaan iti sag-97 a babbarangay, Abra nga 88, Mountain Province nga 84, Apayao nga 48, ken ti Baguio City a 43.
Gapu iti dayta, naipatulod kadagaiti nasao a babbarangay dagiti 493 nga Human Resources for Health a nurses ken midwives.
Sigun kenni Dr. Kilakil, naipanamnama met ti panakaipaay iti kaskenan a benepisyo kadagiti nasao a personnel bayat ti panagturong dagitoy kadagiti underserved ken unserved a babbarangay.//Bombo Genzel Depayso
