BAGUIO CITY – Dinadael dagiti otoridad ti nasurok P6.86 M a gatad dagiti marijuana iti serye ti eradication operations nga insayangkat dagiti otoridad sadiay Kibungan, Benguet manipud nangrugi ti bulan ti Enero.
Maibasar iti report ti Police Regional Office Cordillera, nadiskobre dagiti iligal a mula iti lima a disso manipud iti lima a sitio iti tallo a barangay sadiay Kibungan.
Immuna a nadiskobre idi January 3-4 sadiay Sitio Topinao ken Sitio Mayangao iti Barangay Madaymen ti agarup nasurok 1,350 a pinuon ti marijuana ken 10 kilo ti napagango a pinuon ti marijuana.
Simmaruno a nadiskobre idi January 8-9 sadiay Sitio Batangan ken Sitio Lamagan iti Barangay Tacadang ti agarup nasurok 14,200 a pinuon ti marijuana ken 15 kilo ti napagango a pinuon ti marijuana.
Kabayatanna, nadiskobre pay idi kalman, January 11 sadiay Sitio Tebteb iti Barangay Badeo ti mapattapatta a P755,000 a gatad dagiti pinuon ti marijuana ken napagango a pinuon ti marijuana.
Dagus a pinarot ken inuram dagiti operatiba dagiti nadiskobre nga iligal a mula ken nangalada laeng ti sample nga agserbi nga ebidensiya.
Nupay kasta, awan ti natiliw a cultivator kabayatan dagiti nasao nga operasyon.
Sigun iti pulisya, ti serye dagiti marijuana eradication operations sadiay Kibungan, Benguet ket deklarasyon a seryoso ti gobyerno ken ti pulisya iti kampanya kontra iti iligal a droga tapnu maragpat ti drug-free, nadurdur-as ken nataltaled a Kibungan.
