Naarestar dagiti dua nga Street Level Individual(SLI) iti naikasa a buy-bust operation idiay Barangay Holyghost Extension, Baguio City idi Sabado, Enero 10.
Dagiti suspek ket agtawen iti 30 ken 39 a lallaki nga agpada a residente iti Baguio City.
Nakumpiskar manipod kadakuada ti agarop 14 a gramo iti maatap a shabu nga addaan iti Standard Drug Price (SDP) a ₱95,200.00 ken agarop 7.5 a gramo iti maatap a dried marijuana leaves nga agbalor met iti ₱900.
Malaksid kadagiti kontrabando,nakumpiskar metlaeng kadagiti suspek dagiti non-drug evidence kas iti black sling bag,kwarta, boodle money, identification cards, coin purse, cellular phones, lighters, keychain with key, lugan ken awan kargana a plastic sachet.
Dagiti suspek ket sumango iti kaso a panaglabsing iti Comprehensive Dangerous Drugs Act of 2002.
Naballigi ti nasao nga operasyon babaen iti nagtitipon a pwersa dagiti kameng iti PNP Drug Enforcement Group (lead unit)-Special Operations Unit-Cordillera, Baguio City Police Office-Police Station 3, Philippine Drug Enforcement Agency-Cordillera Baguio-Benguet Provincial Office, Regional Police Drug Enforcement Unit (RPDEU) CAR, ken City Intelligence Team (CIT)-Baguio Regional Intelligence Unit (RIU) 14.//Bombo Noveh Organo
