Nagturong ti nasurok uppat a pulo a barko iti China pakairamanan iti “warship” idiay Scarborough Shoal tapno lapdan ti civilian mission dagiti Pilipino, a nakaangayan iti “fishing activities” iti exclusive economic zone (EEZ) iti Pilipinas idi Huebes.
Iti social media ni sigud nga Estados Unidos Air Force official ken sigud nga Defense Attaché Ray Powell, kinuna a naggarawen ti China iti nasao a posisyon tapno manglapped.
Karaman kadagiti nakalayag sadiay ket ti maysa a People’s Liberation Army (PLA) Navy ship, walo a barko iti China Coast Guard (CCG) ken tallo pulo ket uppat a Chinese militia vessels iti aglawlaw iti Scarborough Shoal.
Kinumpirmar met daytoy ni Philippine Coast Guard spokesperson for West Philippine Sea Commodore Jay Tarriela.
Itay laeng nabiit, impakaamo iti Atin Ito coalition, a nangidauloan iti civilian mission a nabalinanda nga inikkat ti agserserbi a lapped dagiti barko iti China.
Sigun kenni Atin Ito co-convenor ken Akbayan president Rafaela David, nabaelanda a nakasangpet iti Bajo de Masinloc tapno suportaran dagiti manggalap babaen iti panangipaayda ti abasto sadiay.
