DAMAG ESPESYAL – Saan a ninamnama ni Brittany Simpson ken ti pamilyana a masarakanda pay ti tarakenda nga aso kalpasan ti pito a tawen.
Sigun kenni Brittany, kellaat a naawan ti tarakenda a ni Ruger bayat ti panagay-ayamna iti arubayan dagitoy.
Inatapda a biktima ti dognapping ni Ruger nu sadino dimmanon payen iti maysa a bulan ti panagbirokda ngem saan a nabirukan.
Nupay kasta, idi Hunyo 2024, nakigtot ni Brittany idi makitana ti maysa a ladawan a naipablaak iti maysa a page dagiti mapukpukaw nga aso.
Dagus nga kinontak ni Brittany ti nangipablaak a ni Rebecca Latimer ken kinunana a posible a maymaysa ti aso nga adda iti ladawan ken ti napukaw nga aso dagitoy.
Nangipablaak pay daytoy ti ladawan ni Ruger idi puppy paylaeng kas ebidensiya.
Dagus met a nagturong ni Brittany iti veterinary clinic para iti nasao nga aso ken kinumpirmar met ti microchip agency a ni Ruger daytoy.
Saanen a binirok ni Brittany ti nangtakaw ken ti detalye ti panagbiag ti aso iti uneg ti mano a tawen.
Iti agdama ket napintas ti kasasaad ni Ruger iti sidong ti agpaypayso nga owner daytoy.
