BAGUIO CITY – Naideklara ni National Electrification Administration (NEA)-Appointed BENECO General Manager Atty. Marie Rafael kas persona non grata iti probinsia ti Benguet.
Iti naangay a sesyon ti Sangguniang Panlalawigan, 13 a miembro daytoy ti pimmabor a maideklara ti abogado kas persona non grata bayat a nagtalinaed nga abstention ti maysa.
Inlawlawag ti bise-gobernador ti probinsia a malaksid iti maatap a panagtake-over iti main office ti BENECO main office, maatap a nag-ulbod ni Atty. Rafael idi kinunana kadagiti board kabayatan ti session idi Nobyembre 3 a simmangpet daytoy sadiay Beneco South Drive Office iti oras ti alas siete ti agsapa a maysa nga rason a maideklara daytoy kas persona non grata.
Kabayatanna, inlawlawag ti nag-abstain a saan daytoy nga pimmabor gaputa nasay-sayaat nu mapilaan ti kaso dagiti karaman nga indibidual nu aniama ti nilabsingda nga linteg iti maatap a panagtake-over iti opisina ti BENECO.
