BAGUIO CITY – Nakemmeg ti maysa a negosyante gapu iti kaso nga extortion wenno panagkikil babaen iti entrapment operation nga insayangkat dagiti pulis iti maysa a pagtagilakuan sadiay Kilometer 6, La Trinidad, Benguet idi kanikadua.
Nabigbig daytoy a ni Marlet Wagsi Balao, 46-anyos, negosyante ken residente ti Alno, La Trinidad, Benguet.
Nabigbig met ti biniktimana a ni Avelina Pagaduan, 60-anyos, mannalon ken residente ti Topinao, Poblacion, Tuba, Benguet.
Maibasar iti report, nagreklamo ti biktima iti pulisya a maysa a managan ‘Ador’ ti agkikikil ti kwarta manipud kenkuana ken naibaga nga ibatina ti kwarta iti nasao a pagtagilakuan.
Dagus a naisayangkat ti entrapment operation a nagresulta iti panakakemmeg ni Balao.
Narekober manipud iti nasao a negosyante ti marked money a P8,000 ken maysa a cellphone.
Insayangkat ti nagtipon a pwersa ti Criminal Intelligence Group – Benguet, Tuba PNP, La Trinidad PNP ken dagiti personnel ti Intelligen Unit ken Investigation Unit ti Benguet Police Provincial Office.
